У Палацы мастацтваў размаўлялі і спявалі па-беларуску

Мова - часцінка чалавечай культуры, гістарычнай спадчыны. Дзякуючы ёй, працягваюць жыць традыцыі. Мова - праяўленне павагі да нашага мінулага і сімвал яднання людзей, незалежна ад месца і часу іх пражывання.

 У рамках штогадовай акцыi «Размаўляем, чытаем, спяваем па-беларуску», прысвечанай да Міжнароднага Дня роднай мовы, 26 лютага 2020 года ў Палацы мастацтваў адбылася літаратурна-музычная гасцёўня «Беларуская мова - мелодыя сэрца». Гэта сустрэча - нагода яшчэ раз задумацца пра лёс беларускай мовы, той, адзінай, якую завём матчынай.

 У ходзе мерапрыемства, удзельніцай народнага тэатра Палаца мастацтваў Наталляй Астроўскай была праведзена цікавая і пазнавальная віктарына «Вандроўка па Беларусі», дзе гледачы звярнуліся да гісторыі паходжання і станаўлення сучаснай беларускай літаратурнай мовы, прыгадалі імёны тых, хто зрабіў усё, каб беларускае слова жыло ў вяках.

 Прыгажосцю роднай мовы гледачы маглі захапляцца, назіраючы за творчымі нумарамі салісткі народнага камернага хору Палаца мастацтваў Валерыі Новікавай, салісткі народнага эстраднага ансамбля «Саунд» Анастасіі Савенковай, салісткі Палаца мастацтваў Ірыны Аўсянікавай і ўзорнага харэаграфічнага калектыву «Крынічка». Дапаўненнем мерапрыемства стаў тэматычны відэаролік «Беларуская мова» на аснове верша Пятруся Броўкі «Калі ласка».

 Думаючы пра будучыню роднай мовы, мы павінны размаўляць па-беларуску, бо для будучага нашага, нашых дзяцей і ўнукаў беларуская мова неабходна.

  Рэжысёр масавых свят

ДУК «Палац мастацтваў г.Бабруйска»  Вольга Чайкова

 Фотаздымкі  Ірыны Аўсянікавай