У Бабруйску адбыўся танцавальны майстар-клас "Танцы да ўпаду. Восеньская рапсодыя".

22 лістапада ў Магілёўскім абласным тэатры драмы і камедыі ім. В.І. Дуніна-Марцінкевіча адбыўся танцавальны майстар-клас "Танцы да ўпаду. Восеньская рапсодыя".

Арганізатарамі мерапрыемства з'яўляюцца Беларуская прафесійная танцавальная ліга, тэатр драмы і камедыі ім. В. І. Дуніна-Марцінкевіча і клуб гісторыка-бытавых танцаў "Сябрына".

Мельнік Канстанцін і Юлія Багдановіч з'яўляюцца вядучымі майстар-класу.

-Юлія, колькі танцавальных майстар-класаў вы ўжо правялі ў гэтым сезоне?
-Майстар-клас у габеленавай зале нашага тэатра адбыўся ўжо 7 разоў.

-Што ўключана ў праграму майстар-класа?
-У праграму мерапрыемства ўваходзяць класічныя вальсы і полькі, сярэднявечныя контрдансы і танцы народаў свету! Так і ў гэты раз: пяшчотныя вальсы змяняліся гістарычнымі бранлямі і шапелуазам. Пасля яскравай італьянскай мелодыі гучалі армянскія і румынскія матывы! Ну і без любімых беларускіх танцаў таксама не абышлося! "Млын", "Падыспан" і "Лявоніха" – вось такі разнастайны асартымент на любы густ! І на любы ўзрост!!

-Ці ёсць абмежаванні па ўзросту, і якая колькасць удзельнікаў?
-Дарэчы, самаму малодшаму ўдзельніку мерапрыемства – 15, а старэйшыя – без абмежаванняў! Аднойчы прыязджала ўдзельніца, якой было 80+! Колькасць удзельнікаў майстар-класаў прыблізна ад 40 да 60 чалавек.

-Ці ёсць удзельнікі з іншых гарадоў, акрамя Бабруйска?
-У нашым танцавальным сезоне ўдзел прымаюць не толькі мясцовыя жыхары, але і госці! Мінск, Гомель, Магілёў, Салігорск і Рагачоў!

-Калі плануецца наступны майстар-клас?
-Наступныя "Танцы да ўпаду" адбудуцца ўжо напярэдадні Новага года. Мы ўсіх запрашаем 26 снежня а 17-й гадзіне сустрэцца і патанчыць вакол навагодняй ялінкі разам з намі. А пакуль будзем рыхтавацца: кожны панядзелак сустракаемся ўвечары і развучваем танцы, якія будуць у святочнай праграме.

-Што вы параіце людзям, якія не вырашаюцца прыйсці на майстар-клас?
-Я вельмі разумею тых, хто не можа адважыцца прыйсці паспрабаваць. Нават калі няма каго ўзяць з сабой для храбрасці, каб падтрымаў вас, то прыходзьце самастойна! Вам трэба толькі першы раз патрапіць – і вы апынецеся ў дабразычлівым асяроддзі сяброў. Я сама – той яшчэ баязлівец, але, патрапіўшы на заняткі аднойчы, я ўжо не магу спыніцца і не ўяўляю сябе без танцаў.

-Падзяліцеся, што стала галоўнай крыніцай вашага натхнення для заняткаў танцамі?
-Танцы так упрыгожваюць наша жыццё! Вы ведаеце, дзякуючы гэтай захапляльнай суполцы, шчаслівых людзей становіцца больш!