Кожны дзень новыя рубяжы: на Бабруйшчыне працягваюць ушаноўваць перадавікоў жніва
2 августа 2024
Учора 1 жніўня віншаванні і падзякі з гэтай нагоды прымаў экіпаж зернеўборачнага камбайна СВК “Гігант” у складзе старшага камбайнера Алега Вяроўкіна і камбайнера Максіма Быкава, якія намалацілі звыш тысячы тон зерня.
Маючы добрую традыцыю — не пакідаць такія падзеі без увагі, на поле за в. Малінаўка, дзе ў гэты дзень гаспадарка вяла ўборачныя работы, прыехалі начальнік вытворча-эканамічнага аддзела ўпраўлення па сельскай гаспадарцы і харчаванні райвыканкама Віктар Садоўскі, старшыня раённага аб’днання прафсаюзаў Віталь Сідзюк, старшыня райкама прафсаюза работнікаў АПК Максім Ганжураў і прадстаўнікі СВК.
— Упэўнены, што намалочаная тысяча тон зерня — не апошняя на рахунку вашага зладжанага экіпажа ў гэтую ўборачную кампанію. Жадаю далейшай паспяховай работы і новых вытворчых дасягненняў, — адзначыў Віктар Садоўскі.
Віталь Сідзюк, уручаючы экіпажу прывітальны адрас, падзякаваў хлебаробам за працу і нагадаў, што сёлета яны намалацілі першую тысячу на некалькі дзён раней за мінулы год.
Спрыяльнага надвор’я, высокага ўраджаю, якаснай уборкі і далейшай плённай працы пажадаў экіпажу-тысячніку Максім Ганжураў. Разам з лістамі падзякі лідар раённай прафсаюзнай галіновай арганізацыі ўручыў перадавікам жніва каштоўныя падарункі.
Такім чынам на гэтую пару ў раёне 5 вадзіцеляў-тысячнікаў, 2 — экіпажы і адзін — камбайнер-тысячнік.
