Урачыстасць, прымеркаваная да Дня медыцынскіх работнікаў, прайшла сёння ў Бабруйскай гарадской паліклініцы №2. Удзел у мерапрыемстве прынялі работнікі як паліклінікі, так і сельскіх медустаноў: урачы, медыцынскія сёстры, малодшы персанал інш.

Віншуючы калектыў з прафесійным святам, галоўны ўрач БГП №2 Таццяна Гацко адзначыла, што ў галіну аховы здароўя прыходзяць і ў ёй застаюцца толькі апантаныя прафесіяй людзі, незалежна якую пасаду займаюць. Тыя, хто ўмее спачуваць, жыве з патрэбай дапамагаць іншым, не стамляючыся вучыцца дзеля гэтага, авалодвае новымі прафесійнымі ведамі.

— Усім вам вялікі дзякуй. Я вельмі цаню ўклад кожнага ў нашу агульную высакародную справу — стаяць на варце здароўя людзей. Жадаю ўсім моцнага здароўя, дабрабыту, міру і добрых людзей побач, — адзначыла Таццяна Васільеўна і ўручыла шэрагу медработнікаў за добрасумленную працу ганаровыя граматы і лісты ўдзячнасці Бабруйскай цэнтральнай бальніцы і Бабруйскай гарадской паліклінікі №2.

Лідар пярвічнай прафсаюзнай арганізацыі паліклінікі Ірына Жураўлёва ўзнагародзіла найбольш актыўных членаў “пярвічкі”.

tribunapracy.by